مریدکے نارووال روڈ کنسٹرکشن عملہ کی نااہلی خاتون جاں بحق بچہ زخمی

نارنگ منڈی کے قریب مریدکے۔نارووال روڈ پر نارنگ موڑ سٹاپ کے قریب موٹرسائیکل ریت کے ڈھیر سے ٹکرا گئی، جس کے نتیجے میں 45 سالہ خاتون جاں بحق اور ایک بچہ زخمی ہو گیا۔ ریسکیو 1122 کے مطابق حادثے کی اطلاع ملتے ہی امدادی ٹیمیں فوری طور پر موقع پر پہنچ گئیں۔ ریسکیو عملے نے زخمی خاتون اور بچے کو ابتدائی طبی امداد فراہم کرنے کے بعد انہیں قریبی ہسپتال منتقل کیا۔ ریسکیو حکام کے مطابق نامعلوم خاتون دورانِ علاج زخموں کی تاب نہ لاتے ہوئے دم توڑ گئیں، جبکہ زخمی بچے کو مزید علاج کے لیے لاہور کے ہسپتال ریفر کر دیا گیا۔ ذرائع کے مطابق جاں بحق ہونے والی خاتون کا تعلق نارووال سے تھا اور وہ موٹرسائیکل پر سفر کر رہی تھیں۔ حادثہ مریدکے۔نارووال روڈ پر نارنگ موڑ سٹاپ کے قریب پیش آیا۔ مقامی افراد کا کہنا ہے کہ یہ حادثہ سڑک پر موجود ریت کے ڈھیر کے باعث پیش آیا۔ ان کا الزام ہے کہ یہ صورتحال تعمیراتی عملے کی غفلت اور نااہلی کا نتیجہ ہے۔ تاہم متعلقہ حکام کی جانب سے اس حوالے سے تاحال کوئی باضابطہ مؤقف سامنے نہیں آیا۔